Die Gautengse premier, Panyaza Lesufi, het sy ernstige kommer uitgespreek oor toenemende spanning namate ‘n beplande protesoptog teen onwettige immigrasie op 30 Junie nader kom.

In ‘n videoboodskap het Lesufi gesê Gauteng sal regstreeks deur die betoging geraak word omdat die provinsie die tuiste van baie immigrante is en na verwagting een van die brandpunte van die protes sal wees.

“Ek wil eerstens duidelik wees: Ons ondersteun die reg op vreedsame protes ten volle. Dit is ‘n hoeksteen van ons demokrasie en word deur die Grondwet beskerm. Ons deel die betogers se kommer oor onwettige immigrasie. Ons is ook verheug dat president Cyril Ramaphosa reeds maatreëls ingestel het om dié kwessie aan te spreek,” het hy gesê.

Om openbare veiligheid te verseker, werk die provinsiale regering nou saam met wetstoepassingsowerhede.

Lesufi het inwoners verseker dat planne in plek is om die situasie binne die raamwerk van die wet te hanteer en dat geweld geensins geduld sal word nie.

Hy het inwoners ook aangemoedig om kalm te bly, die wet te gehoorsaam en die polisie toe te laat om hul werk te doen. Volgens hom is die regering ten volle daartoe verbind om alle mense en eiendom in die provinsie te beskerm.

Intussen monitor die Nasionale Gesamentlike Operasionele en Intelligensiestruktuur die situasie daagliks om moontlike risiko’s vroegtydig te identifiseer.

Luitenant-generaal Tebello Mosikili het bevestig dat ‘n geïntegreerde operasionele plan in al nege provinsies geaktiveer is.

“Ons geïntegreerde operasionele plan is in al die provinsies geaktiveer. Dit bring die SAPD, die Suid-Afrikaanse Nasionale Weermag, metropolitaanse polisiedienste, verkeersowerhede, rampbestuurstrukture en ander relevante departemente saam om ‘n gekoördineerde regeringsreaksie te verseker.

“Die fokus van die operasie is om lewens te beskerm, kritieke infrastruktuur te beveilig, die vrye beweging van mense en goedere te handhaaf, openbare orde te bewaar en te verseker dat alle gemeenskappe veilig bly.”