VANDERBIJLPARK – Drie motors was vanmiddag omstreeks 13:00 in ‘n ongeluk op die hoek van Darby- en Good Yearstraat in CW6 betrokke.

Omstanders op die toneel het vertel hoe een van die motors (‘n silwer Polo) glo redelik vinnig in die straat gery en nie by die kruising gestop het nie.

Daar kan bygesê word dat die stoptekens wat by die kruising behoort te wees, nie meer daar is nie.

Die Polo het toe ‘n Nissan-bakkie so hard getref dat laasgenoemde op sy dak te lande gekom het.

Die ongeluk het ‘n kettingreaksie veroorsaak.

Die Nissan-bakkie het op sy beurt ‘n Taljaard-taxi getref, wat op sy beurt agteruit deur ‘n betonmuur is.

Die bestuurders van die onderskeie motors is op die toneel behandel en daarna hospitaal toe vervoer.

Niemand is noodlottig in die ongeluk beseer nie.