SASOLBURG – Die NG Fontein Gemeente het ʼn Avontuurweek van 29 Junie – 2 Julie aangebied.

Die tema was lig en 75 kinders het aan die besondere vakansieprogram deelgeneem, terwyl vier volwassenes elke dag uitgehelp het. Van die tieners het ook ingespring om die woelige avonturiers in toom en gelukkig, te hou.

Daar is elke dag ʼn ander kunsaktiwiteit aangebied saam met speletjies en Bybelstudie.

Maandag is daar vlytig kleilampies en blikliggies gemaak. Die jongspan was baie opgewonde toe hul kerse kon giet met was en ys.

Die volgende dag is daar kaleidoskope gemaak en speletjies gespeel. Die kinders het groot pret met skeerroom en chips gehad en ʼn hele paar moes die aand gaan hare was het.

Woensdag het almal soos vuurvliegies aangetrek om hul liggies te laat skyn. Almal het ook ywerig hul week se kunswerke klaargemaak en skaduweepoppe gepraktiseer.

Die grootste lekkerte was egter die laaste dag. Daar is stokbrood gebraai en die brandweer het kom kuier.

Die kinders het dit baie geniet en het selfs die kans gekry om saam met de brandweerpersoneel water te spuit.

Voor almal finaal gegroet het, het elkeen ʼn kersie gekry. Die kerse is een vir een aangesteek om te wys dat mense hul lig na die wêreld toe moet versprei.

Chirna Kruger sê: “Ons was mildelik geseën. Ons het verskeie borge gekry en die Ring se finansiële bydrae het baie gehelp om die Jeugsorg kinders en ander kinders se geld te betaal.”

Sy het ook namens die organiseerders die kerk se personeel bedank vir hul hulp, met ʼn spesiale dankie vir Ds. Altus Carstens wat elke dag die Bybelstudie gelei het.