VANDERBIJLPARK – Daar staan MooiVaal se redaksiespan Maandagoggend by Rage Zone Vaal. Gerat vir die dag, maar onseker wat om te verwag. Wat ons ervaar het, het ons wildste drome oortref.

Met maskers en handskoene het ons die Rage Room aangedurf. Elkeen het sy wapen gekies en een vir een het ons die kans gekry om bottels en ou elektroniese toerusting te slaan dat jy net sien glas trek.

Ettienne van Rensburg en Sifiso Jimta het ‘n ou wasmasjien so getimmer dat geen mens dit meer sal herken nie. Die adrenalien het gevloei en daar was baie kommentaar.

Later het ons onder groot gelag probeer byl gooi en boogskiet. Laasgenoemde is toe nie so maklik as wat boogskutters dit laat lyk nie.

Christiaan Cloete: Ek het nog nooit regtig ervaar hoe dit voel om ’n skootrekenaar met ’n voorhamer stukkend te slaan nie. Ek bedoel, natuurlik het ek al daaroor gefantaseer, maar sjoe, nou het ek dit gedoen. Dit was nogal ’n belewenis.

Ettienne van Rensburg: Terapeute gaan eersdaags sonder werk sit. In plaas daarvan om ’n vloermoer in die publiek te gooi of te fantaseer om jou man in sy slaap te versmoor, besoek eerder Rage Zone.

Om goed te breek sonder enige skuldgevoelens is terapeuties. Sien die persoon wat jou woedend maak in jou geestesoog en laat waai. Swaai ’n bofbalkolf, breekyster of ’n piksteel.

Om ’n dubbelbalie wasgoedmasjien flenters te slaan was ’n heerlike uitlaatklep. Dit was terapeuties en insiggewend.

Na die spanbou kyk mense met ander oë na sekere redaksielede… Loop katvoet vir die stil kollega. Stille water diepe grond onder draai die duiwel rond! Moet nie uitmis nie! Dit is vet pret!

Elsje Vermeulen: Jy weet dalk nie hoe nodig jy dit het om Rage Zone te besoek, totdat jy daar is nie! Vir ‘n wyle vergeet mens van deadlines, en ander uitdagings wat voorlê.

Hier betree jy ‘n wegbreek-wêreld waar jy ‘n masker van jou keuse aansit en daarna jou inner-superhero kans gee om te speel. Wie het nou gedink dit kan so lekker wees om goed stukkend te slaan?

Maar om dit self te doen, is baie beter as om van iemand ander se ondervinding te lees. PS: Ek hoor dames het dit die nodigste om soms van hul opgeboude frustrasies ontslae te raak.

Gerda Bruinette: ‘n Spanbousessie by Vaal Rage Zone was so reg in die kol. Ek het lanklaas so baie gelag. Die oomblik as jy een van daardie maskers opsit, is jy dadelik in jou eie wêreld. Om ‘n bofbalkolf met al jou mag te swaai en dan te sien, en te hoor, hoe drie bottels op een slag disnis geslaan word, is stres-ontlading van ‘n ander aard.

Volg hulle gerus op Facebook @Rage Zone Vaal.