VANDERBIJLPARK. – Guglielmi Massimo (1:51:11) het Saterdagoggend die jaarlikse Century Electrical-fietswedren oor 80km gewen, nadat hy net-net vir Gerhard Falch (1:51:12) en Mathys Koekemoer (11:51:12) in ‘n naelrit-einde uitgestof het.
Dit is vanjaar die 14de keer wat die fietswedren plaasgevind het.
Die ryers het mekaar opgekeil en die feit dat die eerste 20 stelle wiele die wenstreep in ‘n tyd van 1:51:17 oorgesteek het, getuig daarvan.
Die gemiddelde spoed van ryers was 43.3km/h, met die Falch wat 43.17km/h getrap het.
Die vroue-wedren is deur Chané Jonker (1:51:16) gewen. Sy het ook algeheel agtste geëindig. Zani Rossouw en Piet Laubscher (1:51:20) was die eerste tandem-span oor die wenstreep. In die 40km-wedren het Wayne van der Walt in ’n tyd van 1:00:28 koning gekraai, gevolg deur Boela van Staden (1:00:29) en Daniel Coetzer (1:04:54).
Natalie Long(1:04:58) van die Hoërskool Transvalia het die vroue-wedren gewen. Sy het ook algeheel sesde geëindig.