VANDERBIJLPARK. – Die Vaaldriehoek spog met ses atlete wat Atletiek Suid-Afrika se voorlopige span gehaal het wat later vanjaar in Mauritius aan die CAA Afrika Kampioenskap gaan deelneem.
Die Vaaldriehoekers is Marioné Fourie (110m-hekkies), Marli Dimond (800m), Marga Cumming, Alan Cumming, Tshepang Makhethe en Marinda Greyling (al vier hamergooi).
Marli is tans nog agter die skoolbanke by die Hoërskool Transvalia en Marioné is ‘n oudleerling van die Hoërskool Driehoek in Vanderbijlpark. Tshepang en Marinda is onderskeidelik produkte van die HTS Sasolburg en die Hoërskool Sasolburg.
Die sibbe Alan en Marga is albei studente aan die Noordwes-Universiteit se Vanderbijlparkkampus en gee ook skool in die Vaaldriehoek. Marioné is tans die SA senior vrouehekkies-kampioen en Alan, ‘n onderwyser aan die Hoërskool Driehoek, is die SA senior mans hamergooikampioen.