VEREENIGING. – Die kwik is besig om te styg in die aanloop tot die eindstryde van die Valke Peregrine-liga wat eerskomende Saterdag in Springs beslis word.

Die eerste rugbyspan van die Vereeniging Rugbyklub en Springs kom teen mekaar te staan terwyl NWU Vaal se o.21’s teen Brakpan in die finaal speel.

Volgens Schalk Snyman, hoofafrigter van VRK, besef hy dat sy span Saterdag met iets “spesiaals” vorendag sal moet kom om Springs op sy tuisveld te klop.
“Die tuisveldvoordeel het ‘n groot impak en swaai die skaal in Springs se guns. Springs het baie skietgoed. Balbesit gaan baie belangrik wees. Goeie dissipline en verdediging is ook belangrik. Ons voel dat ons skade kan aanrig met ons korrelwerk pale toe as ons strafskoppe kan afdwing. Ons gaan meer na die tafel toe moet bring as ooit tevore om die tuisveldvoordeel uit te balanseer,” het Snyman op die vooraand van die eindstryd gesê.