Die vierde ronde van die Carling Curriebeker Premier-afdeling beloof nog ’n naweek van opwindende rugby, met die kragmeting tussen die verdedigende kampioen Suzuki Griekwas en voorlopers Fidelity ADT Leeus in Kimberley as die hoofwedstryd.

Slegs drie punte skei tans die voorste vyf spanne op die punteleer. Die Leeus is eerste met 12 punte, gevolg deur die Griekwas en Toyota Cheetahs (11 elk), Sanlam Boland Kavaliers (10) en DHL Stormers XXIII (9). Ná verlede naweek se verrassings is daar ook nie meer ’n onoorwonne span in die kompetisie nie.

Die aksie skop Saterdag om 13:00 in Kimberley af wanneer die Griekwas die Leeus ontvang. Die Griekwas het verlede week die Toyota Cheetahs met 24-21 geklop, terwyl die Leeus die Vodacom Bulls XV met 42-19 afgeransel het om die voortou op die punteleer oor te neem. Albei spanne het twee oorwinnings uit drie wedstryde en nog ’n spannende stryd word verwag.

Die Vodacom Bulls XV speel daarna hul eerste tuiswedstryd van die seisoen teen die Airlink Pumas op Loftus Versfeld. Die Bulls is steeds sonder ’n oorwinning en het tot dusver reeds 122 punte afgestaan. Die Pumas sal egter vol selfvertroue wees nadat hulle verlede naweek die Sanlam Boland Kavaliers met 20-15 in Wellington geklop het.

Later Saterdag ontvang die Hollywoodbets Sharks XV die Sanlam Boland Kavaliers by Princess Magogo-stadion in KwaMashu. Die Sharks, wat vier 2026 Junior Springbokke in hul groep het, sal ná hul nederlaag teen die DHL Stormers XXIII wil terugbons, terwyl Boland hul eerste nederlaag van die seisoen agter die rug wil sit.

Die ronde word Sondag in Kaapstad afgesluit wanneer die DHL Stormers XXIII die Toyota Cheetahs op Athlone-stadion aandurf. Die Stormers het verlede week hul veldtog laat herleef met ’n 36-28 oorwinning oor die Sharks, terwyl die Cheetahs hul eerste nederlaag van die seisoen teen die Griekwas gely het.

Wedstryde:

Saterdag, 8 Augustus

• Suzuki Griekwas v Fidelity ADT Leeus – Suzuki-stadion, Kimberley (13:00)
• Vodacom Bulls XV v Airlink Pumas – Loftus Versfeld, Pretoria (15:05)
• Hollywoodbets Sharks XV v Sanlam Boland Kavaliers – Princess Magogo-stadion, KwaMashu (17:15)

Sondag, 9 Augustus

• DHL Stormers XXIII v Toyota Cheetahs – Athlone-stadion, Kaapstad (15:00)

Al vier wedstryde word regstreeks op SuperSport uitgesaai.