VANDERBIJLPARK – Hokkie is ‘n wrede minnares. Wanneer dinge goed gaan, is ‘n mens in die sewende hemel.
Hoe verder mens vorder hoe minder is die ruimte vir foute. Dit is weer tydens die uitspeelronde van die Noordvaalkompetisie vir o14-dogterspanne beklemtoon.
Die toernooi het gister in Vanderbijlpark op Curro se astrobaan na vier dae se mededingende hokkie tot ‘n einde gekom.
Hoewel die toernooi weens ysige en gure reënweer op ʼn antiklimaks geëindig het, het die vier dae se wedstryde oorgenoeg opwinding opgelewer. Die HS Merensky en HS Noordheuwel deel vanjaar die beker.
Vanuit ʼn plaaslike oogpunt het die HS Transvalia en Dr. Malan gewys dat die toekoms van hokkie in die Vaaldriehoek in veilige en bekwame hande is. Valia het in die doodsnikke van hul kragmeting teen Nelspruit na ʼn omstrede beslissing met 1-0 verloor om vierde in die toernooi te eindig.
Die Dokkies het Heidelberg Volkskool in hulle uitspeelwedstryde geklop om vyfde te eindig.
