VEREENIGING – D-dag breek eerskomende Saterdag in die derde rondte van die Sibanye Stillwater Superliga aan wanneer Vereeniging Rugbyklub (VRK) se eerste rugbyspan die verdedigende kampioen, die Northam Rhinos, in Thabazimbi aandurf.
Die Naka Bulle, Northam Rhinos, Brakpan, Sibanye Warriors, Grizzlies, Wanderers en Vereeniging is na twee rondes steeds onoorwonne.
VRK het verlede Saterdag vir TUT met 26-3 geklop nadat die wedstryd kort na rustyd weens weerlig afgelas is.
Flip de Kock en Nollis Marais is nou aan die stuur van sake by die Rhinos na die tragiese en skielike afsterwe van hul hoofafrigter Bevin Fortuin.
Die Rhinos het die Naka Bulle in verlede jaar se eindstryd geklop en gaan ‘n moeilike derduiwel op sy tuisveld wees.
Vereeniging is tans goed op dreef en sal veral versigtig optimisties wees na hulle sege met 40-34 oor Harlequins in die eerste rondte.
Die Rhinos het in die tweede rondte harde bene gekou om die Quins met 38-26 te klop.
VRK se lywe gaan ook redelik vars wees aangesien hulle glad nie stampe en stote in die tweede helfte van hulle kragmeting teen TUT verduur het nie.
