Taxi-passasiers spring dood vry

KOMATIPOORT – Die taxi was na die Mosambiek-grens op pad toe ‘n vragmotor op die Grimmin-pad voor die voertuig ingedraai het. Die bestuurder het die gevaar sien aankom en ‘n ongeluk probeer vermy deur uit te swaai.

Hy is oor die eiland by die vierrigting- kruising, het beheer oor die motor verloor en by die advertensieborde wat besoekers aan Komatipoort verwelkom, tot stilstand gekom.

Daar is groot skade aan die voertuig gerig, maar wonderbaarlik is niemand beseer nie. ‘n Swanger vrou is wel per ambulans na ‘n hospitaal vir waarneming vervoer.

‘n Ander taxi is gehuur om die geskokte passasiers na hul eindbestemming te vervoer.