SKUKUZA – As vrywillige vlieënier het Tokkie Botes sedert 2013 sy Bell 206-helikopter nou al langs meer as 2 000 renosterkarkasse in die Nasionale Krugerwildtuin (NKW) en ander reservate staangemaak om spanne forensiese kundiges op en af te laai.

Hy het meer as 500 vliegure hiervan self geborg.

KYK hoe forensiese spanne by ‘n wildlewe misdaadtoneel te werk gaan

Die onselfsugtige ekokryger het met hierdie taak begin nadat hy en ‘n vriend wildtellings vanuit die lug aangepak het. Hy het die wildtuinbestuur genader en aangebied om sy tyd, brandstof en die helikopter te borg.

“Ek glo daaraan dat ons mekaar voortdurend moet vra hoe ons mekaar en die omgewing kan help. Wanneer mense begin praat, kan dinge begin gebeur,” sê die ewige pragmatis.

Toe hy by die wildtuinbestuur by die aanvang gehoor het dat sy eertydse helikopter, ‘n Robertson 44, te klein is om renosters of renosterwesies in nood te vervoer, het hy uit sy eie die nuwe Bell aangeskaf.

Botes glo in geregtigheid. Vir hom is daar net een plek vir stropers: agter tralies.

Sy toewyding om bewysstukke te help vind om hierdie doel te verwesenlik, kom uit ‘n diep bewustheid dat stropers ook verhoed moet word om weer dieselfde misdade te pleeg.

“Dis al hoe ons in hierdie stryd teen stropers voor gaan kom, deur toe te sien dat diere ook voordeel trek uit hoe ons hierdie euwel bekamp, doelgerig en met voortreflikheid. En as dit beteken ek moet van dooie renoster tot dooie renoster vlieg, dan doen ek dit,” sê die sakeman van Hartebeespoort.

Hy is ook gemoeid met die bewaring van olifante en het al dikwels hiervoor die Bell se neus in die rigting van Malawi en Zambië gestuur.

Dit is die wrede metodes waarmee diere tydens strooptogte dood gemartel word, wat Botes telkens opval en ontstel as hy land om die spanne af te laai.

“Soms is die renosters se hakskene afgekap. Meesal word hulle gelos om dood te bloei. Dit maak mens egter net meer vasberade om die aandadiges aan te keer. As jy elke dag voor jy gaan slaap, kan voel jy het vandag ‘n verskil gemaak, kry die lewe betekenis.”

LEES MEER oor hoe die DNA op bewyssstukke van stropingsmisdaadtonele aangewend word in hofsake