‘Lenie Blou’ weerklink by Blue Moon
Die Ruiters van die Kaap-toer het by Blue Moon die Laevelders weer eens daardie verslawende proe van Spoegwolf gegee.
Spoegwolf se toer het in Johannesburg afgeskop voor hulle die pad na Mbombela gevat het.
Dit is egter nie net dié groep wat deel van die Blue Moon-been van die toer was nie. Die plaaslike groep, Apollo, het ‘n bietjie metal tot die dag verleen, waarna Bad Peter gesorg het vir akoestiese klanke wat die siel gevoed het, en toe is die wolwe aan die beurt.
Die skare was daar vir elke oomblik en elke liriek; een aanhanger het dit selfs reggekry om op die verhoog, reg langs die hoofsanger, Danie du Toit, te beland, en het uit volle bors sy mikrofoon met hom gedeel.
LEES OOK: Langnaweek beteken groot sakebedrywighede vir vlooimark
Die hoofsanger het oudergewoonte van die verhoog afgetree en die skare het hom op die hande gedra – letterlik.
Na Spoegwolf was daar ‘n effense breuk, waarna Synth Peter die skare aan die dans gekry het.
Die Ruiters van die Kaap-toer is volgende in Benoni op 27 November te sien, en daarna in Pretoria op 4 Desember.
