Die Kethura-drama-ateljee het op 14 Oktober ‘n feestelike afsluiting by die Bos-restaurant in Marlothpark aangebied, waar die dramastudente vanjaar se prestasies gevier het.

Die ateljee het ‘n hele rits prestigetoekennings tydens die Nelspruit Eisteddfod en die provinsiale ATKV-Redenaarskompetisie ingepalm.

Xander Kotze het as naaswenner by dié redenaarskompetisie uit die stryd getree en ook die prys vir die beste taalgebruik ontvang. Met al hierdie prestasies, moes die studente en hul ouers dit behoorlik vier.

Kethura het ook ‘n gedugte digter in hul midde.

Alexa Kotze se gedigte is vanjaar in die Inkspraak4-bloemlesing gepubliseer. Haar gedigte het groot genot tydens die eisteddfod verskaf en sy het ook spesiaal vir Laerskool Malelane se spreekkore geskryf.

Lees ook: VIDEO: Krokodille verorber bok in Krokodilrivier by Marlothpark

Beide die kore het prestigetoekennings verower.

Die restaurant se eienaars, Danie en Morné, het die verhoog vir die klein akteurs oopgestel sodat hulle daar kon optree. Die ouers en restaurantgangers het heerlik aan die kos gesmul terwyl hulle na die opvoerings gekyk het.

Twee tonele, Rooikappie en Ansie en Riekie, is opgevoer, en daar was verskeie samesprake, monoloë en poësie-optredes.

Lees ook: Wilde Woensdag saam met Wilna Wheater

Twee sangitems is ook gelewer. Van die ouers het vir die kinders ‘n skreeusnaakse spooktoneel as verrassing opgevoer om hulle met hul harde werk geluk te wens.

Odette Dreyer en Charn Steinmann het die afsluiting gerëel en die foto’s is deur Ilke van Zyl geneem.

Die Kethura-drama-ateljee word deur Talita Swanepoel, wat al 25 jaar in die bedryf is, bestuur.