Steve Hofmeyr kom kuier in Mbombela
Dit was ’n uiterste aangename aandjie uit vir gesinne en vriende saam met Steve Hofmeyr by die botaniese tuine.
Steve Hofmeyr het op 19 October tydens ‘n heerlike somersaand by die Botanical Garden Restaurant vir vermaak uit die boonste rakke gesorg.
Hy het van sy ou, maar steeds gewilde treffers, soos “Pampoen”, “Die land” en “Sit die ligte aan” gesing. Sy kitaar is nader getrek en die gaste is met ‘n keurspel van Neil Diamond-liedjies getrakteer.
Natuurlik was daar ook ‘n verrassing vir dié wat sy optrede bygewoon het. Die gehoor was bevoorreg om sy nuwe liedjie, “Mamba”, heel eerste te hoor en die musiekvideo te sien. ‘n Heel gepaste liedjie vir die Laeveld.
Hofmeyr het ook ruiterlik erken dat hy ‘n vrees vir slange het.
LEES OOK: Van kuierverhoog tot hoofverhoog by Innibos
Die aanhangers is meegevoer deur die lied “Kantel”, ‘n duet deur Hofmeyr en Leon Ferreira.
Na die vertoning het Hofmeyr met sy aanhangers gesels en vir foto’s saam met hulle gestaan.
LEES OOK: Drama-ateljee in Marlothpark eindig die jaar op ‘n hoë noot
Volgens die organiseerder, Vanessa Roets, was die aand ‘n reusesukses. “Die konsertgangers het dit terdeë geniet en is dit eens dat Steve steeds gewild is in die Laeveld.”
