Die Laeveld is geseënd met uitnemende jong talent.

Vyf harpe, twee vleuelklaviere en drie pianiste se hande op die klawers het Saterdagaand, 19 Oktober tydens ‘n fondsinsameling wat die pianis en harpspeler Karla Brits vir Huis Betlehem gereël het, vir uitstekend klassieke musiek gesorg.

Karla en die res van die jong talent is almal studente van die bekende Theresa Prinsloo, by wie Karla vanjaar haar musiekstudies voltooi het. Sy is nie net fenomenaal op klavier nie, maar beskik ook oor uitstekende vaardigheid met die harp. Sy het saam met Prinsloo op klavier moeilike klassieke werke soos Ludwig von Beethoven se Klavierkonsert No 5: Adagio un poco mosso opgetower.

In skrille kontras met die groot klassieke werke van Chopin en Beethoven het Karla se klavierstuk, “Wednesday Plays the Cello”, ‘n ander sy van haar talent gewys.

“Experience” van Ludovico Einaudi, waarvoor al die instrumente en deelnemende studente ingespan is, het die gehoor in verwondering gelaat.

Prinsloo se geniale musikale kennis is deur die aand soos ‘n goue draadjie in die stukke, wat sy elkeen self moes verwerk het, geweef.

“La Campanella” van Franz Liszt, wat sy saam met die gr. 7-leerder Pieter Prinsloo op klavier opgevoer het, was een van die gehoor se gunstelinge.

Die intieme konsert was aan huis van Prinsloo en haar man, dr. Gerrit Haarhoff, waar die mure met kunswerke gevul is en waar ‘n atmosfeer geskep is wat die gaste na vervloë tye teruggevoer het.