Nadat Amy Steyn (17), ‘n matriekleerling van Hoërskool Nelspruit, twee voorste kruisligament-operasies moes ondergaan weens sportbeserings, het sy haar netbaltekkies vir hakskoene verruil.

LEES OOK: SA teen beauty competing in pageant in China

Amy vertel dat sy haar knieë tydens twee afsonderlike netbalwedstryde beseer het en vir ‘n lang tyd geen sport mag beoefen het nie. Ná maande se rehabilitasie het sy besef haar netballoopbaan is verby, waarna sy die modelwêreld betree het – ‘n besluit wat reeds groot vrugte afgewerp het.

“Ek het in Julie 2025 by Timeless Modelling & Deportment Academy met modelwerk begin en net vier maande later aan SACOPA (South African Championships of Performing Arts) deelgeneem, waar ek ook met die Grand Champion Overall-titel bekroon is,” vertel sy.

Kort daarna is sy vir die Suid-Afrikaanse span gekies en sal sy in Julie vanjaar aan WACOPA (World Championships of Performing Arts) in Las Vegas deelneem. Sy is ook gekies om van 23 Februarie tot 10 Maart op die loopplank tydens Parys se Modeweek te verskyn. Daar sal sy klere van verskeie modeontwerpers dra en hoop om deur internasionale modeverkenners raakgesien te word.

“Mode het my nog altyd gefassineer. Vandat ek ‘n klein dogtertjie was, het ek gedroom om eendag Paris Fashion Week by te woon en nou loop ek sommer self op die loopplank. Dis regtig ‘n droom wat waar geword het,” sê Amy.

Die opwinding stop nie daar nie. In April reis sy na IFCArts CANNES (International Forum of Performing Arts, Creation & Fashion), waar sy die geleentheid het om moontlik deur ‘n groot modehuis gekontrakteer te word.

“Indien ek geteken word, sal dit my lewe in ‘n nuwe rigting stuur en net weer eens bewys watter groot God ons dien,” sê sy.

Ten spyte van haar besige program fokus Amy steeds op ‘n gesonde ingesteldheid, die verfyning van haar tegniek en haar skoolwerk. “Ek moet ekstra hard werk by die skool, maar my onderwysers is baie tegemoetkomend en ondersteunend,” erken sy.

LEES OOK: Season’s greetings and prosperous New Year from Miss Mpumalanga

Sy droom daarvan om internasionaal as model te werk, terwyl sy ook beplan om eendag ‘n graad in regte of besigheid te studeer.