Pumas reg vir Curriebeker
Boland was vuur en vlam in die tweede helfte met twee drieë wat die gaping verklein het en na 60 minute was die telling 24-19.
Dit het Woensdagmiddag Pumadrieë in die Kaap gereën. Die Steval Pumas het met hul laaste opwarmingswedstryd voor die afskop van die Absa Curriebekerreeks op 7 Augustus, die Boland Kavaliers met 38-19 ore aangesit.
Dit was die span se tweede kragmeting in die Kaap. In hul eerste, Saterdag het hulle die DHL Westelike Provinsie 19-6 geklop.
Die tuisspan het die eerste vyfpunter van die kragmeting aangeteken, maar kort voor lank het die Pumas se JJ Breet agter die doellyn gaan kuier. Jason-Colin Fraser en Jaco Bouwer het ook voor rustyd drieë gedruk en die telling na 24-5 in die besoekers se guns aangeskuif.
Boland was vuur en vlam in die tweede helfte met twee drieë wat die gaping verklein het en na 60 minute was die telling 24-19.
Vyfpunters deur Bernado Botha en Marnus Schoeman was genoeg om die Pumas se oorwinning te verseël. Die losskakel, Justin van Staden het net twee skoppe deur die pale gemis.
