Skool se sportsterre word gepas vereer

Op grond van akademie, sport, leierseienskappe, dienslewering en gesindheid, het Jacques Marais met die hoof se toekenning vir 2015 tydens Laerskool Nelspruit se merietetoekenningsgeleentheid weggestap.

December 6, 2015

Carli Koch 1 minute read

Jacques was diensraadvoorsitter in 2015 en is as senior atletiek, rugbyspeler én sewesrugbyspeler van die jaar aangewys.
Hy het met die string prestasies ook die senior sportseun van die jaar-toekenning ontvang.

Hy sien met groot verwagting uit om sy hoërskoolloopbaan by Hoërskool Nelspruit voort te sit waar hy deel van hulle sportakademie gaan wees.

Angelique Nel is as sportdogter van die jaar gekroon.

Sy het ook met die trofee vir landloopatleet van die jaar weggestap. Sy het haar Mpumalanga-kleure verower en is ook in dié hokkiespan opgeneem.

Om sodoende met dié spogprestasies weg te stap, word daar vanaf gr. 4 punte ingesamel om uiteindelik te bepaal wie die trofeë gaan verower.

Die 12-jarige Jacobus Meyer het ‘n toekenning vir sy deelname in combat tang soo do verower nadat hy twee bronsmedaljes by die Gevegkuns Wêreldkampioenskappe in Las Vegas verower het.