Potchefstroom se top jong opkomende atlete het hulle talent teen die beste in die wêreld by die afgelope o.20 Wêreldatletiekkampioenskappe in Cali, Kolombië bewys.
Hierdie kampioenskappe wat vanaf 1-6 Augustus plaasgevind het, was ‘n uitstekende geleentheid vir Atletiek Sentraal Noordwes se beste atlete om hulle land met trots te verteenwoordig.
Die NWU verspringatleet, Karmen Fouché, het in die finaal van die vroue verspringitem ‘n nuwe persoonlike beste afstand van 6.31 meter opgestel. Dit was net 19 cm kort van ‘n bronsmedalje en Fouché kan trots wees met haar algehele sesde plek wat ‘n uitstaande prestasie is.
Nog ‘n voormalige Gimmie wat haar reputasie versterk het is die middelafstand atleet, Danielle Verster.
Verster het in die 1500 meter-finaal met ‘n tyd van 4:16.36 ‘n negende plek behaal.
Armand Willemse, ‘n matriekleerder van Gimmies, skitter ook in sy eerste groot internasionale byeenkoms met ‘n gooi van 65.80 meter. Hy behaal ‘n 13de algehele plek uit 18 atlete en mis net uit vir ‘n plek in die finaal.
Willemse moes ‘n paar beseringstruikelblokke oorkom om die vliegtuig na Kolombië te haal, en het nietemin op sy ouderdom teen atlete 2 jaar ouer as hy beslis die mas opgekom.
Volkies se matriekleerder en top stapper, Janise Nell, het in haar tweede agtereenvolgende o.20 kampioenskappe deelgeneem.
Sy behaal ‘n tyd van 56:56.62 om die 40ste plek te vat.
Suid-Afrika behaal algeheel 5 medaljes (2 goud, 1 silwer en 2 brond) gedurende hierdie kampioenskappe.
