Gimmies se eerste seunshokkiespan behaal ‘n fantastiese tweede plek in die o.19A afdeling van die jaarlikse Noordvaal Hokkietoernooi wat die afgelope naweek plaasgevind het.
Gimmies het die eindstryd 2-1 teen Ligbron verloor.
Hierdie span het in die groepfase net-net kop bo water gehou na hulle teen Waterkloof met 2-1 verloor het en teen Hoërskool Krugersdorp met 2-2 gelykop gespeel het.
Gimmies se doelwagter, Wian Landman, was briljant en sy werksverrigting het sy span na die kwarteindrondtes geneem.
Dit is toe dat Gimmies hulle vorm terugkry en klop vir Hoërskool Middelburg gemaklik 3-0. In die halfeindstryd teen Noordheuwel vat Gimmies ‘n 4-3 oorwinning (8 sekondes) nadat die wedstryd in gewone tyd 1-1 geëindig het. Edwin Nelson, onderkaptein was in hierdie wedstryd ‘n besliste staatmaker.
Gimmies se eerste dogtershokkiespan eindig in die vyfde plek in hulle Noordvaaltoernooi. Na groot oorwinnings teen Nelspruit (3-0), Monument (4-0) en Midstream (5-0) in groepwedstryde, val hul vas in die kwarteindrondte teen Pretoria Girls High met 1-0.
