Potchefstroom Gimnasium se naelloop-sensasie, Sandri van Rooyen (17) het slegs ‘n week na sy brons by die ASA Junior en Jeug atletiekkampioenskappe in die 100m verower het, nou ook Senior SA goud om haar nek.
Hierdie tiener, wat deur Werner Burger afgerig word, het in die 4x100m alfos vir vroue op Saterdag, 1 April deelgeneem en Atletiek Sentraal Noordwes (ACNW) met trots op die NWU McArthur Stadion in Potch verteenwoordig.
Saam met haar spanmaats, Amiel Rothman, Rose Xeyi en Tamzin Thomas kon hulle vir die gunsteling Atletiek Gauteng Noord, in die finaal klop in ‘n tyd van 45.50. Thomas het die laaste 100m gehardloop om die wen vir ACNW te verseker.
Van Rooyen se persoonlike beste in die 100m is 11.84 sekondes wat sy ook in Potch op 30 Maart opgestel het.
In die SA Senior Atletiekkampioenskappe die afgelope naweek kon sy die finaal haal, wat alreeds ‘n groot prestasie is. Sodoende was sy deel van die agt vinnigste atlete in die land.
Sy behaal ‘n agtste plek in die finaal met ‘n tyd van 12.07. SA kampioen, Carina Horn, wen die wedloop in 11.52 sekondes.
