Die talentvolle plaaslike tennisster, Jahnie van Zyl, het nog ‘n titel op haar indrukwekkende kerfstok geplaas toe sy die SA Junior Meesterskampioenskappe in die dogters o.14 kategorie verower het.
Die SA Junior Meesterskampioenskappe het vanjaar in Kaapstad vanaf 13-15 Oktober plaasgevind. In hierdie toernooi speel die land se top agt spelers teen mekaar in o.12, o.14, o.16 en o.18 ouderdomskategorieë.
Die eerste gekeurde Van Zyl van die Riaan Venter Tennisakademie klop Jenna Theron 6-0, 6-2, Lonwabo Majeke 6-0, 6-2, sowel as Gitta-mè Victor met 6-2, 6-1 oortuigend in die poelfase. In die halfeindstryd klop hierdie leerder van Potchefstroom Gimnasium vir Roxy Bredenkamp met 6-4, 6-2.
Die finaal is ook eensydig met Van Zyl wat vir die tweede gekeurde Alicia Taylor met 6-0, 6-1 kafdraf. In vyf wedstryde verloor sy nie ‘n enkele stel nie en verloor net 14 potte.
Van Zyl het vanjaar ‘n uitstekende seisoen waar sy ook sy die SA o.14 titel verower het en ook naaswenner in die Afrika Junior Tenniskampioenskappe is. Sy is ook die nommer een gekeurde speler in Afrika en het ook in Frankryk ‘n toernooi-sege behaal.
Ander spelers van die Riaan Venter Tennisakademie, Reuben de Klerk en Kaitlyn Ramduth is ook wenners in hulle onderskeie ouderdomskategorieë by die Junior Meesterskampioenskappe.
Roxy Bredenkamp, Gitta Victor, Juvan van Pletzen, Hlumi Kekana en Michael Bell het ook die Riaan Venter Tennisakademie tydens hierdie gesogte toernooi verteenwoordig.
Dogters-wenners:
Onder-18: Kaitlyn Ramduth
Onder-16: Donna le Roux
Onder-14: Jahnie van Zyl
Onder-12: Megan van Vuuren
Seuns wenners:
Onder-18: James Hart
Onder-16: Reuben de Klerk
Onder-14: Dehan van Deventer
Onder-12: Nicholas Kruger
