Potchefstroom Gimnasium se dogtershokkiespanne het onlangs by die Noordvaal-uitspele uitmuntend presteer en gewys hoekom hulle as van die sterkste spanne in die streek beskou word.

Die o.14A-span het ’n derde plek ingeneem, terwyl die o.15A- en o.16A-spanne tweede geëindig het. Die eerstespan het ook sterk vertoon en ’n derde plek behaal.

Nog ’n hoogtepunt vir Gimmies was die prestasie van twee van hul doelwagters. Renate van der Merwe (o.15) en Hayley Stevens (o.16) is albei as die beste doelwagters in hul onderskeie ouderdomsgroepe aangewys.

“Ons is ongelooflik trots op elke speler,” het die skool gesê. “Hulle het nie net hul tegniese vaardighede gewys nie, maar ook ware sportmangees en deursettingsvermoë.”