Die NWU Eagles het die werk ingesit en is nou opnuut gefokus om hul ondersteuners met topklas rugby hierdie komende Maandag, 23 Februarie te bederf.

Die NWU pak die nuwelinge van die Varsitybeker die Emeris, aan op die Fanie du Toit Sportgronde om 16:45. Hierdie eerste kragmeting tussen hierdie twee spanne beloof om kliphard te wees en sal heel moontlik die besoekers se oë laat rek.

‘n Varsitybekerwedstryd op die Fanie du Toit sportgronde is iets wat elke NWU rugbyspeler voor leef. Nadat hul CUT met 59-41 geklop het verlede week, is die motivering hoog om nog meer te kan doen en op hulle foute reg te maak.

Volgens NWU hoofafrigter, Burger van der Westhuizen, was sy span se vertoning nie iets waarop hy tevrede was nie, al was hy dankbaar oor die wen.

Van der Westhuizen meen dat daar nog baie werk voorlê voordat die NWU hul beste spel kan lewer.

“Ons wedstrydbestuur moet beter. Die foutefaktor was heeltemal te hoog. Die bal was wel baie nat, wat dit moeilik gemaak het. CUT se drieë was als van ons foute af,” noem hy.

Die NWU was teen halftyd met 24-34 agter en moes hul sokkies optrek om ‘n beter tweede helfte vertoning te lewer. Die NWU het 35 punte in die tweede helfte aangeteken teenoor CUT se agt. Die NWU se blitsige linkervleuel, Therlow Prins, het ook ‘n uitstekende driekuns gedruk. Voorlangs was die NWU sterk en kon meer beheer in die tweede helfte neem met die plaasvervangers wat ekstra woema gebring het.

“Ons moes net by die beplanning bly. Dit wat ons doen, waarin ons glo en waarin ons goed is,” verduidelik Van der Westhuizen.

Die Emeris het met 41-61 teen UJ vasgeval. Jacques Marais, sowel as Nkazimulo Mzolo het twee keer vir die Emeris gaan druk.

“Dit gaan lekker wees om by die huis te speel. Dit is ook die eerste tuiswedstryd vir van ons nuwe ouens. Om tuis te speel verander nie wat ons moet doen nie.”