Ses laerskole het tydens Laerskool M.L. Fick se Uniprop-Emmiefees op Saterdag 7 Maart mekaar die stryd aangesê op die netbalbane en rugbyvelde van Potch Volkies se sportterrein. Die Emmiesfees bied ‘n samekoms vir Laerskool M.L. Fick, Laerskool Lichtenburg, Laerskool Baillie Park, Laerskool Emfulenipark, Laerskool Vryheidsmonument en Laerskool Goudkop om vriendskaplike wedstryde te speel voordat die seisoen in volle swang afskop.

Foto’s: Laerskool M.L. Fick/Facebook

Volgens die M.L. Fick was hierdie fees vanjaar vir die tweede keer baie suksesvol aangebied. Behalwe vir goeie rugby en netbal, was daar ook verskeie stalletjies en heerlike verversings wat die dag ekstra woema gegee het.

Meneer Heyns Deacon, skoolhoof van Laerskool M.L. Fick noem dat die fees aangebied word in die plek van die aandreeks en hy is opgewonde om te sien hoe dié fees ‘n jaarlikse instelling in Potch gaan word en hoe dit elke jaar gaan groei.

Laerskool M.L. Fick spreek hul opregte dank uit teenoor Uniprop, Volkies, die besoekende skole, ouers, personeel en die organiseerders van die fees.