Volkskool Potchefstroom het onlangs die eerste bal in hul splinternuwe binnenshuise krieketsentrum geboul. Hierdie binnenshuise krieketsentrum plaas Volkies onder die topskole in die land en is deel van ’n langtermyndroom om krieket verdere vlerke by die skool te gee.

Volgens Volkies se krieketdirekteur, Wynand Schmitt, is die skool baie trots op hierdie langtermynprojek.

“Dit is ’n baie groot fasiliteit. Die nette is klaar en daar gaan kleedkamers wees, asook ’n onthaalarea vir ouers. Dit is ’n game changer vir ons skool en ons krieket. Die kinders wil in die beste fasiliteite oefen. As dit reën, kan hulle ook binne oefen, so ons is nie meer beperk nie,” noem hy.

Volgens Schmitt wil Volkies met die beste skole in die land kompeteer, en met hierdie fasiliteit kan hulle aanhou om topspelers op te lewer.

“Om kompeterend te kan bly, moet ons fasiliteite van die beste wees sodat ons die beste moontlike kans het teen ander topskole.”