Gimmies se wenresep vir hul seëvierende o17A-netbalspan by die Noordwesdag sluit nie net tonne talent op die baan in nie, maar bevat ook ‘n belangrike bestanddeel.

Dit is Martiné Jordaan, ‘n voormalige Gimmie-netbalster wat in 2020 aan die skool gematrikuleer het.

Martiné is die hoofafrigter van Gimmies se o17A-netbalspan, en onder haar leiding en passie vir haar alma mater speel haar span kookwater-netbal.

“Dit beteken ongelooflik baie vir ons as ‘n span. Ons het spelers wat nog nooit SA’s toe was nie, so dit is wonderlik om vir hulle dié geleentheid te gee,” sê Martiné.

Wanneer Martiné nie by die skool betrokke is nie, kan netballiefhebbers haar in die North West Flames se kleure sien. Sy is ook die kaptein van die span, wat net nog ‘n bewys van haar leierskap is.

“Ek is mal oor afrigting. Ek geniet die kinders en hul persoonlikhede vreeslik baie. Dit is lekker om van my kennis oor te dra en dan te sien hoe hulle groei.”