Vereeniging se spoorwegstasie het ‘n lang en interessante geskiedenis wat al in die 1890’s begin het. Die stasie het sedert die dorp se begindae ‘n belangrike deel van Suid-Afrika se spoorwegnetwerk uitgemaak omdat steenkool en ander produkte uit die Vaaldriehoek na Johannesburg en ander groot sentra in die land vervoer moes word.

In die beginjare was die treinstasie ‘n lewendige kuierplek vir die eerste inwoners, waar hulle die jongste nuus en skinderstories uit die stad kon verneem.
Van die Vaaldriehoek se ouer inwoners onthou nog die goeie ou dae toe hul ouers hulle in die 1960’s en 70’s oor naweke na die stasie geneem het om in die ou lokomotief, genommer “SAR Class 6B no 500” by die ingang te speel, terwyl hul ouers vir elkeen ‘n smullekker “stasiepaai en sous” in die skitterskoon stasierestaurant bestel het.

Die stasie in ongelukkig vandag ‘n verwaarloosde afskynsel van die eens spoggerige diensverskaffer wat jaar-na-jaar as die netjiesste stasie in die land aangewys is.