SA-kampioenskappe: Fietsryer se dood noodsaak wysiging van roete
Die heuwelagtige Suikerbosrand Natuurreservaat sal nie meer deel vorm van die roete van vanjaar se Nasionale Padfietskampioenskap nie.
MIDVAAL – Fietsry-entoesiaste kan hierdie naweek (6 tot 9 Februarie) ‘n effens gewysigde, maar steeds opwindende Nasionale Padfietskampioenskap verwag.
Fietsry Suid-Afrika het ‘n verandering aan die padwedrenroete aangekondig nadat Suikerbosrand Natuurreservaat besluit het om alle geleenthede binne die reservaat te staak.
Hierdie besluit volg op ‘n tragiese ongeluk tydens die Meals on Wheels-fietswedren in Oktober verlede jaar, waartydens ‘n fietsryer haar lewe verloor het ná ‘n botsing met ‘n stilstaande ambulans.
Vaalweekblad het verlede jaar berig dat die ambulans in daardie stadium ‘n ander fietsryer bygestaan het wat ook by dieselfde plek geval het toe die noodlottige tweede voorval plaasgevind het.
“Uit respek vir hierdie besluit en om die veiligheid van alle deelnemers te verseker, sal die padwedrenroete nie meer deur die reservaat gaan nie,” het Fietsry Suid-Afrika in ‘n verklaring gesê.
In plaas daarvan sal deelnemers aan die padwedren nou van ‘n hersiene 27km-roete gebruik maak.
“Die nuwe roete, wat aan deelnemers van die 2024-wedren bekend is, is aangepas met die toevoeging van ‘n uitdagende nuwe opdraande. Afhangende van hul kategorie, sal fietsryers verskeie rondtes van die baan voltooi,” het Fietsry Suid-Afrika in ‘n verklaring gesê.
Fietsry Suid-Afrika het die voordele van hierdie nuwe formaat uitgelig en genoem dat die korter roete die toeskouers se ervaring sal verbeter, aangesien ondersteuners meer geleenthede sal hê om hul gunsteling fietsryers aan te moedig.
Die hersiene baan sal ook die opstel van voedingsones vergemaklik, wat verseker dat deelnemers maklik toegang tot hidrasie en voeding het.
“Ons verstaan dat roeteveranderings aanpassings verg, maar ons waardeer die begrip van alle deelnemers. Ons doel bly om ‘n veilige, opwindende en goed georganiseerde kampioenskap te bied,” het die organisasie verklaar.
Finale instruksies aan deelnemers, insluitend tye, roetekaarte, GPS-roetes en inligting oor die aangewese voedingsones, sou teen 31 Januarie aan alle geregistreerde deelnemers gestuur word.
Die tydrenroetes bly onveranderd.
