Na ’n opwindende dag langs die rugbyveld tydens die Danie Rossouw-week, is Werner Rossouw en sy seun, Ben (18) se lewens op pad huis toe wreed kortgeknip in ’n motorongeluk.

LEES OOK: Jong pa sterf in gru-botsing op R40 naby Witrivier

’n Familiewoordvoerder het aan Laevelder bevestig dat die ongeluk by die kruising van Hennie van Tilstraat en Chief Mgiyeni Khumalo-rylaan in Witrivier plaasgevind het. Beeldmateriaal, wat deur Laevelder gesien is, wys duidelik hoe ’n Isuzu-bakkie by dié kruising van die hoofstraat oor ’n rooi verkeerslig ry en teen die pa en seun se Volkswagen Polo bots.

Die impak van die ongeluk was groot en het die Volkswagen op sy dak laat draai.

Mediese nooddienste is onmiddelik na die toneel ontbied en die bestuurder van die Isuzu is na Rob Ferreira hospitaal geneem. Uit respek vir die familie en die sensitiwiteit van die beeldmateriaal, het Laevelder besluit om dit nie te publiseer nie.

LEES OOK: Laeveld-legende, Wimpie Strydom, sterf

Laevelder het navrae aan die polisie gestuur, maar het nog geen antwoord ontvang teen die tyd van publisering nie.

Laevelder het ook die familie genader vir kommentaar, maar weens die hangende ondersoek het hulle versoek om nie enige kommentaar te lewer nie en die begrafnisreëlings is ook nog nie bekendgemaak nie.

Hierdie is ’n ontwikkelende storie. Laevelder sal sy lesers op hoogte hou namate meer inligting beskikbaar word.