Wimpie Strydom (39), die voormalige eienaar van Elmadré Slaghuis, het Dinsdag 18 November by sy huis in Pretoria aan ’n hartaanval gesterf.

Sy ma, Marianna Mulder, het die voorval aan Laevelder bevestig.

“Hy het Dinsdag sleg gevoel, badkamer toe gegaan, en toe ’n hartaanval gehad,” het Mulder verduidelik.

Sy skielike afsterwe het die familie en die Laeveld-gemeenskap in rou gedompel.

LEES OOK: Huurder se honde glo verantwoordelik vir Ohrigstad veteraan se dood

Strydom en sy gesin het einde Julie vanjaar na Pretoria verhuis. Hy en sy vrou, Lou-Ann, het saam sy nuwe besigheid, Elmadré Catering & Events, gestig. Volgens sy ma was daar ook reeds planne om ’n vleisfabriek te bou net voor sy dood. “Hy was veral lief om biltong te maak en te spesialiseer in worsmaak vir die nismark,” het sy vertel.

“My kind het swaar gekry ná sy pa se afsterwe en het op ’n nuwe begin besluit nadat die slaghuis verkoop is,” het Mulder erken.

Met groot hartseer en trane het sy gedeel dat sy vertroosting vind in haar seun se lig en liefde wat hy met ander gedeel het.

“My seun was die sonskyn, braaier en Godvresende man wat vir sy Koning en familie geleef het.”

Strydom was die middelkind van sy twee broers, Ebert en Danie. Hy het saam met sy pa in Elmadré Slaghuis gewerk voor sy pa se afsterwe op 25 Februarie 2023. Sy ma het verder vertel dat hy as kind vakansies saam met sy pa in die slaghuis gewerk het. Die slaghuis was ’n bekende plek waar talle Laevelders hul vleis en biltong gekoop het.

LEES OOK: Veteraan naby Ohrigstad wreed deur honde verskeur

Strydom laat sy drie seuns, sy vrou, sy ma en sy twee broers agter.

Begrafnis reëlings in nog nie bekend gemaak nie.