IN FOTO’S | Nostalgiese liefdadigheidsgholfdag ‘n groot sukses vir plaaslike gemeenskap

152 spelers tree terug in die verlede.

5 hours ago

Stefan de Villiers & Zané Botes 2 minutes read

Dandré Neumeyer, Danie Stassen, Paul Gryvenstein en Anton Steenkamp. >Foto: Gia Radnai

Die jaarlikse Du Toit-Smuts en Vennote Prokureurs en Laevelder-liefdadigheidsgholfdag, met Nedbank as hoofborg, het op 23 Oktober by die Mbombela Gholfklub plaasgevind met 38 vierballe en 152 spelers.

Nostalgie en gemeenskap was aan die orde van die dag, en spelers en gaste het die “vintage”-tema voluit uitgeleef en ‘n reis terug in tyd onderneem deur met houtgholfstokke, tradisionele leergholfsakke en plat pette aan ‘n opwindende “scramble drive”-toernooi deel te neem.

Chas Everitt en KW Lowveld is benoem as beste stalletjies en het die tema ten volle uitgebeeld. Subaru is aangewys as “best dressed”.

Die nostalgiese atmosfeer is verder versterk deur unieke dekor soos antieke tikmasjiene, grammofone, ou telefone en “vintage”- Laevelder-versierings. Lewendige musiekvermaak deur die plaaslike groep, Voodoo Kudu, het gesorg vir ‘n feestelike atmosfeer by die klubhuis.

Hierdie 25ste weergawe van die gholfdag het gepaardgegaan met twee ander betekenisvolle mylpale in die streek: Die 140ste herdenking van Laevelder en die 50ste jubileum van Du Toit-Smuts en Vennote Prokureurs. Albei organisasies het met hierdie geleentheid hul diep wortels in die Laeveld gevier.

Hoewel die kompetisie straf was om te bepaal wie met die louere sou wegstap, was liefdadigheid die hoofdoel van die dag.

Die opbrengs was ruim en is verdeel tussen drie plaaslike welsynsorganisasies:

• Laeveldrus: ‘n Gevestigde tehuis in Mbombela wat bekostigbare behuising, veilige sorg en omgee-ondersteuning aan seniors en bejaardes bied.

• Die Dasha-stigting: ‘n Gespesialiseerde sentrum wat kinders en volwassenes met verstandelike en fisiese gestremdhede ondersteun deur middel van ‘n stimulasiesentrum, ‘n spesiale skool en ‘n beskermde werkswinkel.

• Huis Betlehem Nelspruit: ‘n Geregistreerde plek van veiligheid wat ‘n beskermde, liefdevolle hawe bied aan kwesbare kinders wat weens trauma of moeilike omstandighede uit hul gesinne verwyder is.

Jannie Liebenberg, Tanya Lurie, Piet Roux en Niel Pienaar het die dag gewen met 115 punte. Die tweede plek is met 111 punte behaal en derde plek met 109.

Laevelder en Du Toit-Smuts het hulle opregte dank uitgespreek teenoor Nedbank, al die spelers, besighede en borge wat bygedra het om van hierdie mylpaal-geleentheid ‘n onvergeetlike sukses te maak.

ALSO READ: Just 3 points split Lowvelder Golf Challenge top 3