Vier mans wat in verband met die wrede aanval op die Noordwes-boer Donovan Marx aangekla word, het vandag (3 November) in die Ventersdorpse Landdroshof verskyn.

Volgens die Potchefstroom Herald is die beskuldigdes Phindile Alex Namnagcayi (30), Mothoka Godfrey Mathipa (56), Makema Jan Maishane (53) en Thomas Thabo Mathongtlhong (27).

Die vyfde persoon wat aanvanklik in hegtenis geneem is, is intussen van die klagstaat verwyder en sal na verwagting ingevolge artikel 204 van die Strafproseswet as staatsgetuie vir die vervolging optree.

Hofterugvoer dui daarop dat die eerste beskuldigde voorheen op Marx se plaas gewoon het. Die staat het aangevoer dat hy nie na die eiendom mag terugkeer indien hy op borgtog vrygelaat word nie. Die ander drie beskuldigdes woon glo in Promosa, naby Potchefstroom.

Die derde beskuldigde is voorheen aan roof met verswarende omstandighede skuldig bevind en het twee jaar tronkstraf uitgedien.

Ian Cameron, die voorsitter van die portefeuljekomitee oor polisie, het gesê hy steun die staat se teenkanting teen borgtog en meen die vier beskuldigdes behoort in aanhouding te bly terwyl die saak voortgaan.

Hy het verwys na die beweerde verbintenis van een beskuldigde met Marx se plaas, die vorige skuldigbevinding van ’n ander beskuldigde en die moontlike staatsgetuie as redes waarom die borgtogaansoeke deeglik ondersoek moet word.

“Die hof moet elke aansoek op grond van die getuienis en die reg beoordeel. My standpunt vervang nie daardie verantwoordelikheid nie. Die staat moet egter elke relevante bekommernis deeglik voor die hof plaas,’’ het Cameron gesê.

Gemeenskap staan saam

Volgens Potchefstroom Herald het talle boere, aktiviste en gemeenskapslede buite die hof byeengekom om hul steun aan Marx en sy familie te betuig.

Die aktivis Petrus Sitho het gesê sake kan nie so voortgaan nie en dat geregtigheid moet geskied.

Boere in die distrik het plakkate saamgebring om hulle ondersteuning te wys. Gemeenskapslede het ook hul dank aan die polisie, veral die ondersoekbeampte kapt. Bonita Dry en haar span, uitgespreek.

Kallie Kriel, die uitvoerende hoof van AfriForum, het kritiek uitgespreek oor president Cyril Ramaphosa se stilswye oor die aanval.

“Donovan Marx is nie nog ’n statistiek nie. Dit is belangrik dat ons saamstaan en nie aanvaar wat gebeur het nie. President Ramaphosa het nie hierdie aanval veroordeel nie,” het Kriel gesê.

Marx herstel in hospitaal

Marx (50) is verlede Woensdag (28 Oktober) op sy plaas in Syferfontein, tussen Potchefstroom en Ventersdorp, aangeval.

Tydens die aanval is ’n plaaswerker na bewering vasgebind, waarna Marx aangerand en gemartel is. Hy is in die bolyf geskiet, in die been gesteek en sy ore is afgesny.

Hy ontvang behandeling in Mediclinic Potchefstroom. Volgens vorige berigte kon sy ore nie chirurgies weer aangeheg word nie.

Die polisie het aanvanklik twee verdagtes in hegtenis geneem en nog drie die volgende dag aangekeer. Daar is tydens die ondersoek beslag gelê op vier wuurwapens, waarvan twee met die aanval verbind word. Klerasie en juweliersware is na bewering ook teruggevind.

Die beskuldigdes se saak is tot volgende Vrydag (13 November) uitgestel vir die verifikasie van hulle adresse, waarna hul borgtogaansoeke na verwagting aangehoor sal word.

Egpaar ure lank gemartel

Die hofverskyning volg enkele dae ná ’n afsonderlike aanval op Les Brett (67) en sy vrou, Natashia (68), op hul wildsplaas in Broederstroom naby Hartbeespoort, het die Kormorant berig.

Drie gemaskerde mans het Sondagaand (1 November) deur ’n oop houtskuifdeur toegang tot die egpaar se woning verkry. Volgens die polisie het hulle geld geëis en beweer dat hulle geweet het een van die inwoners bedryf ’n kiosk by ’n nabygeleë oord.

Die aanvallers het toegang tot ’n kluis verkry en sewe gelisensieerde vuurwapens van verskillende kalibers, asook ammunisie, gesteel. Die vuurwapens was volgens die polisie op Les se naam geregistreer. Twee selfone, ’n skootrekenaar, kontant en ander persoonlike besittings is ook gesteel.

Uitgetrek, aangerand en met kookwater gebrand

Volgens Warren Geddes, ’n familievriend, is die egpaar ure lank gemartel terwyl die aanvallers toegang tot die kluis geëis het. Hy het aan Pretoria Rekord gesê die egpaar is uitgetrek, aangerand en met kookwater gebrand.

Toe Les aanvanklik weier om die kluissleutels te oorhandig, het die aanvallers glo met ’n boutknipper aan Natashia se tepels begin sny en gedreig om haar te verkrag. Hulle het eers opgehou nadat Les die sleutels oorhandig het.

Volgens verdere inligting wat aan Rekord verskaf is, het die aanvallers ook ’n AK-47 in Les se mond gedruk, wat snye in sy mond veroorsaak het. Hy het ernstige kniebeserings opgedoen en kan moontlik later chirurgie benodig.

Arthur Crewe van SRU High Risk Security het bevestig dat die egpaar met kookwater gebrand, erg aangerand en gesteek is. Paramedici wat hulle behandel het, het die beserings as uiters ernstig beskryf.

Les het aan Kormorant gesê die aanval het sowat drie uur geduur. Die aanvallers het hulle vasgebind en in ’n ingeboude kluis gedwing, waar hulle voortgegaan het om hulle te martel en geld te eis. Hulle het glo herhaaldelik geskree: “Where is the millions?”

Hy het ook beklemtoon dat berigte dat Natashia verkrag is, onwaar is.

Die egpaar kon hulself later bevry en omstreeks 22:30 hulp ontbied. SRU se reaksiespan was volgens Crewe binne vier minute op die toneel. Hommeltuie is ontplooi om na die aanvallers te soek, maar hulle kon nie opgespoor word nie. Lede van die plaaslike gemeenskapspolisiëringsforum en Harties Emergency Medical Services het ook hulp verleen.

Noordwes-polisiewoordvoerder sers. Kelebogile Morake het vroeër vandag aan Pretoria Rekord bevestig dat die Hartbeespoortdam-polisie ’n saak van huisroof ondersoek. Niemand is nog in hegtenis geneem nie.

Morake het gesê Les het geringe beserings opgedoen en mediese hulp by ’n dokter ontvang nadat die aanvallers hom gedreig en glo warm water oor hom gegooi het om inligting uit hom te kry.

Noordwes-polisiekommissaris lt.genl. Arthur Peter Adams het die aanval veroordeel en gesê dit is kommerwekkend dat misdadigers steeds kwesbare mense in die veiligheid van hul eie huise teiken. Hy het inwoners aangemoedig om hul huisveiligheid te versterk en verdagte aktiwiteite by die polisie aan te meld.

Les, wat internasionaal bekend is vir sy werk met wildbewaring, teenstropingsopleiding en bosveldvaardighede, is deur Geddes as die ‘Renosterfluisteraar’ beskryf. Hy is ’n voormalige lid van die spesiale magte en die polisiediens en het meer as 20 jaar gelede die Dung Beetle Bush School gestig om wildbewaring en omgewingsopvoeding te bevorder.

Die aanvalle op Marx en die Brett-egpaar word afsonderlik ondersoek. Daar is geen bevestigde verband tussen die twee voorvalle nie.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.