Die reuk van riool, waterlekke, sowel as talle slaggate is vir etlike jare deel van inwoners in Paulstraat se daaglikse bestaan.

Die Herald het al telkemale oor die slaggate en gebrek aan dienslewering in Paulstraat berig, maar daar blyk nie enige aansienlike verbetering te wees In middel Januarie was daar ook ‘n rioollekkasie in Paulstraat wat tesame met die slaggate ook ‘n nare reuk vir inwoners gelos het. Volgens munisipale woordvoerder Jeanette Tshite, was dit as gevolg van ‘n mangat wat oorgeloop het op die kruising van Suid- en Beyers Naudestraat.

“Stormwater wat in die rioolstelsel ingesypel het, was die rede vir die oorloop. Die area is nou droog nadat tegnici gestuur is om die probleem aan te spreek,” het Tshite gesê.

Johan Zerwick, wyksraadlid van wyk 4, het ook al voorheen aan die Herald bevestig dat Paulstraat al vir meer as ‘n dekade op die Geïntegreerde Ontwikkelingsplan (GOP) geoormerk is, maar dat daar nog geen daadwerklike oplossing gevind is nie.