Beide Volkies en Gimmies dring deur na die half-eindstryde van die Noordwes Skole T20-kompetisie nadat hulle albei verlede week gemaklike oorwinnings behaal het.
Gimmies klop Wesvalia met 6 paaltjies op die Gimmie-Oval terwyl Volkies vir Hoërskool Brits met 41 lopies in ‘n wegwedstryd klop.
Volkies teken 135/8 aan in hul 20 beurte danksy ‘n warrelwind 37 (20) van Kobus Pienaar. Vir eens was Volkies se lopiemasjien, Ludwich Schuld, nie in die lopies nie en is vir 12 uitgeboul. Schuld het die afgelope naweek in ‘n 50-beurt wedstryd teen Lichtenburg wel weer ‘n honderdtal aangeteken.
Brits se Jano van Rooy met (3/19) was uitstekend vir sy span.
Volkies se boulers maak seker van die oorwinning en beperk Brits tot 94/7. Pienaar (3/10) in vier boulbeurte is ook uitstekend met die bal in sy hand.
Gimmies se eerste span was ook indrukkend teen Wesvalia om hul plek in die half-eindstryd te bespreek.
Foto’s: Wouter Pienaar
Gimmies se boulers is een te veel vir die Klerksdorpers wat net 80/9 in 20 beurte kan bereik.
Die blonde snelbouler, Margeo Joubert (3/19), en linkerarm draaiers, Marnu Cronje (2/24) en Phillip du Plessis (2/10) oes die paaltjies in.
Gimmies verloor gereeld paaltjies in die lopiejaagtog, maar is nooit in die moeilikheid nie met Tommie Botha (14 van 24 balle) en Caiden Seleka (19 van 16 balle) wat hul span na ‘n oorwinning neem.
Gimmies speel hierdie week hulle half-eindstryd teen Wolmaransstad terwyl Volkies teen Hoërskool Rustenburg op Donderdag, 31 Augustus by Volkies in die ander half-eindstryd te staan kom.
