Volkies se eerstespan het die afgelope Saterdag, 14 Maart, ’n taai wedstryd teen KHS in die NWU Prestige-sportreeks met 43-19 verloor.
Die telling was egter nie noodwendig ’n ware weerspieëling van hoe naby die spanne op ’n stadium aan mekaar was nie.
KHS het die wedstryd goed begin en sterk geëindig, nadat Volkies in die tweede helfte ’n goeie terugvegpoging geloods het om die halftydtelling van 24-7 na 24-19 te vernou.
Volgens Volkies se eerstespan-afrigter, Mighael de Beer, het KHS dit moeilik vir sy span gemaak weens hul spoed.
“Ons wil net beter wees wanneer ons in die ‘red zone’ kom en meer akkuraat wees. Dit is nog vroeg in die seisoen, so ons toets nog posisies uit, terwyl daar ook ’n paar beserings is. Ek lees nie te veel in hul laaste twee drieë nie. Dit was ’n goeie wedstryd en hulle is ’n goeie span,” het De Beer gesê.
Volkies se derde- en tweedespan het hul wedstryde teen KHS gewen, terwyl die ander spanne almal klei getrap het.
Volkies speel hul volgende NWU Prestige-reekswedstryd op 11 April teen Hoërskool Pietersburg in die kwarteindstryd.
