‘Die Tas in Ponte’ klop aan dromers se deure
Die kabaret Die Tas in Ponte vertel die verhaal van ’n jong sangeres se reis na selfontdekking en drome.
Die Tas in Ponte, Hillbrow, vol stories en ‘n sleutel tot volwassenheid, is vir die eerste keer Dinsdagaand, 23 September, by die Boulevard-teater in Mbombela opgevoer.
Die akteurs het die gaste by hulle aankoms verras toe hulle in ‘n outydse Jaguar daar aangekom het en vanaf die rooi tapyt tot op die verhoog die gehoor op ‘n reis na Die Tas in Ponte geneem het.
Die kabaret handel oor ‘n verhaal van ’n 21-jarige meisie wat haarself as jong sangeres in die vermaaklikheidsbedryf ontdek en probeer sin maak van haar verlede.
LEES OOK: Toe die stof gaan lê, was net Innibos-lekkerness oor
Bianca Swift het die karakter Bibi vertolk en teenoor haar regte ma, Lasea, gespeel wat ook haar karakter se ma, Gigi, was. Beide die akteurs is amateurs en het van Pretoria af gekom om deel van dié vertoning te wees.
“Ek het nog nooit enige drama- of sanglesse gehad nie,” het Bianca gedeel.
Dit was ook per toeval dat sy vanjaar 21-jaar oud word wat haar toneelspel nog meer geloofwaardig gemaak het. Bianca se stem het wel bewys dat sy, sonder enige sanglesse, op die verhoog hoort.
LEES OOK: Nuwe teater in Mbombela met applous begroet
Die regisseur, Bertus de Bruyn, het die teks geskryf en ook die verhoog weer na 30 jaar betree om Bianca se pa, Tobias, te speel. Sy inspirasie vir die teks het van sy liefde vir die gebou in Hillbrow gekom.
“Die gebou is bekend vir sy ronde ontwerp en was die hoogste residensiële gebou in Afrika,” het hy gesê.
De Bruyn het beklemtoon dat die produksie ‘n motiveringsboodskap oordra om mense aan te moedig om hulle ‘tasse’ in hul lewens oop te maak en hulle drome na te jaag.
LEES OOK: Mbombela Boulevard teater maak gereed om die gordyn te lig
“Maak nie saak of jy nie ‘n sukses van iets kon maak nie; doen wat jou gelukkig maak.”
Die groep het ook hulle borge, onder andere Rock Solid Sound Productions by die Promenade-sentrum bedank asook Innibos vir die rooi tapyt, Spring Rain Studio, Audi, Xclu Marketing, A Tua Casa, Swift Group en Tommy Klopper vir die leen van sy Jaguar.
