Veteraan naby Ohrigstad wreed deur honde verskeur
Lede van die gemeenskap het vir Edward Latsky gehelp om die bloeding te stop en sy pa by die ambulans uit te kry.
Peet Latsky (64), ’n veteraan wat verbonde was aan die Suid-Afrikaanse Valskermbataljon, is Woensdag, 12 November, op ’n byna ondenkbare wyse dood nadat hy deur drie kruisras-honde op die plaas Grootboom aangeval is.
LEES OOK: WATCH: MKMVA veterans fire shots in celebration
Hy is omstreeks 14:00 met ernstige bytwonde langs sy bakkie aangetref. Hoewel die presiese omstandighede nog onbekend is, het sy seun Edward, ‘n groenteboer op dieselfde plaas, gesê dat ‘n plaaswerker hom van die voorval in kennis gestel het.
“Toe ek daar aankom, was dit duidelik dat my pa die aanval al vir etlike minute moes verduur het,” het Edward gesê. “Ek kon die honde uiteindelik verjaag, maar hy het hulpeloos en erg bebloed daar gelê.”
Latsky is met kommerwekkende lae bloeddruk per ambulans na Lydenburg Provinsiale Hospitaal geneem, waar hy ‘n bloedoortapping moes ondergaan. Die ambulansdiens wat hom vervoer het, is nog nie bevestig nie. Hy is later na Mediclinic Nelspruit oorgeplaas en uiteindelik na Rob Ferreira Hospitaal, waar hy aan sy beserings beswyk het.
“Peet kon nie eens ordentlik veg nie. Hy kon nie soos ‘n gewone ou opspring en hardloop nie. Sy heupe was swak en hy was afhanklik van sy krukke,” het Eric Reynolds van die Laeveld Valskermbataljon Veterane-organisasie gesê.
Die voorval word deur die Limpopo-polisie ondersoek. Die oorsprong van die honde is aan Laevelder bekend, maar hangende die ondersoek word dit nie genoem nie.
Om die familie te respekteer, het Laevelder besluit om van die grusame besonderhede uit te laat.
LEES OOK: Watervalrivier-boere gemaan om waaksaam te wees ná plaasaanval
Edward het sy dank aan die gemeenskap betuig vir hul ondersteuning, asook aan Rob Ferreira Hospitaal vir hul goeie diens.
Latsky, die voormalige eienaar van Latsky Plaaswinkel naby Ohrigstad, was ‘n bekende figuur in die streek. Die winkel, geleë langs die R36, het vir jare vars plaasprodukte, tuisgebak en basiese benodigdhede aan plaaslike inwoners en reisigers gebied. Peet het dit met toewyding bedryf en was bekend vir sy vriendelike diens en kundigheid.
LEES OOK: Boer in plaasaanval doodgeskiet op Badfontein
Begrafnisreëlings is nog nie bekendgemaak nie.
Meer inligting oor die voorval sal gepubliseer word sodra dit aan Laevelder bekend is.
