Valiant Swart vermaak inwoners van Kaapsehoop
Die Mystic Boer was weer goed op sy stukke toe hy Sondag by die Bohemian Groove Café in die volbespreekte restaurant opgetree het.
KAAPSEHOOP – Buite in die tuin het aanhangers op kampstoele en kniekomberse vir die man se vertoning sit en wag en Glühwein teen die koue geteug.
LEES OOK: ‘n Meesterstuk van rock en pop
Dit het die oggend nog in Kaapsehoop gereën, maar toe Valiant Swart sy klank-stelsel begin opstel, het die wintersonnetjie lui-lui agter die wolke begin kop uitsteek om die Afrikaanse musieklegende sy twee uur van puik musiek en lekkerlagstories uit sy lewe te gun.
Liefhebbers van goeie musiek het van heinde en ver gekom om hierdie kunstenaar, ook bekend as Digter van Dorpstraat en Baas vannie brannewynblues in aksie te beleef.
“Dit was vyf jaar gelede wat ek hier was, en ek sal graag eendag hier in Kaapsehoop kom aftree,” het hy skertsend opgemerk.
Wat Swart so kenmerkend en geliefd maak is die feit dat hy sy vertonings self intens geniet en sy lewe met passie met sy waarderende gehoor deel.
LEES OOK: ‘n Wyser Koos lig die sluier
