Hoër Volkskool Potchefstroom se ster gholfspeler, Christiaan Burke, het vanjaar in sy matriekjaar weer bewys dat hy as een van die land se bestes in sy ouderdomsgroep gereken kan word.
Hy het sy A-spel na die Suid-Afrikaanse Amateur-toernooi gebring waar hy 9de algeheel geëindig het.
Dit is ‘n verstommende prestasie, veral as in ag geneem word dat sowat 150 spelers van meer as 15 lande ook aan dié toernooi deelgeneem het. Dit is van 6 tot 9 Februarie by Pecanwood gehou en Burke het seker gemaak dat hy sy staal wys met -16 waar hy oor die verloop van al vier dae puik gholf gespeel het.
“Ek het tellings van 70, 66, 67 en 69 gespeel om tot by -16 te eindig. Ek voel baie goed oor waar ek geëindig het omdat die beste amateurs in die wêreld deelgeneem het.
“Ek kon ook nie net deelgeneem het nie en is genooi om daar deel te neem,” het Burke genoem.
As hy vanjaar so aanhou, is dit dalk net ‘n kwessie van tyd voor ons hierdie Volkie in die land se grootste toernooie sien.